Thakan Ke Saath Barrha Halqa-E-Nazar Mera
Howa Na Khatam Kisi Morr Par Safar Mera
Uboor Kar Loon Abhi Zindagi Ka Veerana
Kharra Howa Hai Magar Raaste Mein Dar Mera
Bhatak Raha Hoon Main Haalaat Ke Andheron Mein
Chamak Raha Hai Teray Aanso’on Se Ghar Mera
Khud Apne Aap Ko Samjha Ke Laut Aaya Hoon
Koi Bhi Bas Na Chala Jab Hujoom Par Mera
Mila Jo Qurb To Roshan Howe Sabhi Khaakay
Taras Raha Tha Ussi Aag Ko Hunar Mera
Woh Shor Tha Na Suni Apne Jism Ki Awaaz
Bula Raha Tha Mujhe Kab Se Hamsafar Mera
Main Ghir Gaya Hoon Makaanon Ke Darmiyaan * Rashid *
Parra Nahin Abhi Saaya Zameen Par Mera
Poet : Mumtaz Rashid
Post a Comment
Let Me Know If You Want Any Specific Ghazal Lyrics Or Any Word Meaning I Will Try My Best To Reply Fast.