Ghar Chorr Ke Bhi Zindagi Hairaaniyun Mein Hai
Sheharon Ka Shor Dasht Ki Veeraaniyun Mein Hai
Tujhse Mila Tha Jo Kabhi Saahil Ki Aas Mein
Woh Shakhs Aaj Dard Ki Tughyaaniyun Mein Hai
Shauq-E-Safar Pe Baar Hai Saaye Ka Boojh Bhi
Abke Woh Rang Be-Saro-Samaaniyun Mein Hai
Dar Hai Ke Ye Bhi Waqt Ke Haathon Se Mitt Na Jaaye
Halki Si Jo Chamak Abhi Paishaaniyun Mein Hai
Lehron Mein Dhoondhta Hoon Main Khooye Howe Nageen
Chehron Ka Aks Behte Howe Paaniyun Mein Hai
Kitna Kaha Tha Uss Se Ke Daaman Samait Le
Ab Woh Bhi Mere Saath Pareshaaniyun Mein Hai
*Rashid * Koi Mila Na Yahan Shakal-Aashnaa
Har Shakhs Apni Zaat Ke Zindaaniyun Mein Hai
Poet : Mumtaz Rashid
Post a Comment
Let Me Know If You Want Any Specific Ghazal Lyrics Or Any Word Meaning I Will Try My Best To Reply Fast.