Shikasta Lamhon Ka Tu Waqt Ko Hisaab Na De
Hawa Ke Haath Mein Bikhri Howi Kitaab Na De
Guzar Na Dil Ke Bayabaan Se Abr Ki Soorat
Sakoot-E-Dasht Ko Mojoon Ka Iztarab Na De
Main Zindagi Ki Sadaa, Aag Bhi Hoon Shabnam Bhi
Meray Dukhon Ko Samajh Yun Mujhe Jawaab Na De
Meri Hayat Ka Haasil Hain Zard-Ru Patte
Khizaan Ka Naqsh Hoon Tu Mujhko Aab-O-Taab Na De
Teray Wajood Se Baahir Bhi Aik Duniya Hai
Yun Apne Aap Ko Tanhaai Ka Azaab Na De
Na Chhup Sakengi Sadaqat Ki Talkhiyaan * Rashid *
Barhana Shakal Ko Alfaaz Ki Naqaab Na De
Poet : Mumtaz Rashid
Post a Comment
Let Me Know If You Want Any Specific Ghazal Lyrics Or Any Word Meaning I Will Try My Best To Reply Fast.