Na Paas Aata Hai Woh Aur Na Door Jaata Hai
Ajab Tarah Se Meri Tishnagi Barrhata Hai
Ye Kaisi Aag Hai Jis Mein Koi Tapissh Na Dhuwaan
Ye Kaisa Rabt Hai Jo Faaslay Barrhata Hai
Talaash Hai Ussey Khooye Howe Ujaalon Ki
Jo Meri Raah Mein Aksar Diye Jalaata Hai
Samajh Chuka Hoon Main Usske Dukhon Ka Har Andaaz
Jo Baat Baat Pe Meri Hansi Urraata Hai
Jo Woh Nahin To Har Ek Shay Badal Gayi Aise
Ke Jaise Aashnaa Koi Nazar Churaata Hai
Wohi Hain Log Magar Ajnabi Se Lagte Hain
Wohi Makaan Hai Magar Kaatne Ko Aata Hai
Chhupa Saka Na Mah-O-Saal Ka Ghubaar Ussey
Woh Aik Lamha Jo Har Lamha Yaad Aata Hai
Main Parrh Saka Na Kabhi Jis Ke Jism Ki Tehreer
Hai Uss Ka Aks Jo Sheron Mein Jhilmilaata Hai
Hai Ek Talaash Jo Rakhti Hai Muztarib * Rashid *
Woh Aik Saaya Hai Jo Darbadar Phiraata Hai
Poet : Mumtaz Rashid
Post a Comment
Let Me Know If You Want Any Specific Ghazal Lyrics Or Any Word Meaning I Will Try My Best To Reply Fast.