Howi Na Aks-E-Rukh-E-Dard Se Nijaat Meri
Badal Chuki Hai Kayi Aainay Hayaat Meri
Khule Thay Hont Ke Woh Paas Se Guzar Bhi Gaya
Bikhar Ke Reh Gayi Moj-E-Hawa Mein Baat Meri
Sulag Rahi Hai Teray Jism Ki Mehek Har Soo
Badal Gayi Hai Teray Pairahan Se Raat Meri
Chalo Ghamon Ki Kitaaben Sapurd-E-Aab Karen
Woh Keh Raha Hai Kahani Hai Be-Sabaat Meri
Kabhi Sakoot Kabhi Qehqahe , Kabhi Aansoo
Badalti Rehti Hai Har Lamha Kaainaat Meri
Laraz Raha Tha Talatum Mein Zard Sa Patta
Likhi Howi Thi Samandar Pe Waardaat Meri
Na Dab Saki Kahin * Rashid * Meray Lahoo Ki Sadaa
Har Ek Hajoom Mein Taha Rahi Hai Zaat Meri
Poet : Mumtaz Rashid
Post a Comment
Let Me Know If You Want Any Specific Ghazal Lyrics Or Any Word Meaning I Will Try My Best To Reply Fast.