Nazm
Tere Lehje Mein Ab Ki Baar
Aisi Shaanti Thi
Jo Ek Gehre Tazabzub Se Nikal Kar
Zehen Mein Ek Faisle Ke Baad Aati Hai
Tazabzub Se Nikalna Iss Qadar Asaan Nahin Janaan!
Yeh Woh Jangal Hai
Jis Mein Raaste Ek Dosre Ko Kaat Dete Hain
Musafir Ek Qadam Aage Barhaata Hai
To Sau Khadshaat Daman Thaam Lete Hain
Koi Rasta Dikhaane Ka Kahan Soche
Charaghon Ka To Kya Kehna
Yahan To Jugno’on Pe Shak Guzarta Hai
So Aise Ghhup Andhere Mein
Yaqeen Ki Shama Kis Ne Aa Ke Tere Dil Mein Roshan Ki
Tere Chehre Pe Ab Ki Baar
Kaisi Roshni Thi!
Poet : Parveen Shakir
Post a Comment
Let Me Know If You Want Any Specific Ghazal Lyrics Or Any Word Meaning I Will Try My Best To Reply Fast.